Athang vaepaw kum 150 lyazei, Englang ram kya khua lasah haepaw, Henry te azu Sandra tuh Siainn kaelei, ccaw thyalei haepaw zu te vaw thua haezah, ccahpaw4 te ccah nung luh4 lah sahae cia hynh, siainn kaelei, ccaw thyaleinaw hae kunglang hynh pawpaw ngaesii kunaw lahoi khyhae.
Ccahnung ccahpaw luh8 ahoihae paw Henry te Sandra tuh amih lung kou lah pawzah, mihccaw hae siainn kaekho buanaw te ccaw thyakho buanaw lang, thaw te alahzua kawhae.
Mihccaw atawccahpaw nih siainn lahkae te, thyahawnaw alahoi tuh, nungpaw haenih hopya kupaw te ccangpya kupaw bya blyng khah ngaery/ lawkury vae leite, ccaw athya leipaw anungpaw haekhah, “ccaw na thyalei ohpaw, siainn na kaelei ohpaw, na ngae ohpaw, pawpaw mah nanynh langkhyh oh” cite paleih lacih haetuh, Henry te Sandra tuh siainn akae bua lei haepaw te, ccaw athya bualei hae pawhynh, masaty lang ngaesii kunaw alahoi hae.
Thuasalah zeimah, Henry te Sandra tuh nungpaw thuanaw kya, amih lung thanglei te ccangpaw amih ccaw hae hynh zeimah Siainn pong lakae sah bua hae. Amih ccaw haetuh siainn kae te ccaw pong lathya haetuh, masaty e amih Uu paw haw te amih nungpaw haekhah “angaepaw nung te paw hae” bua lahci hae.
Amih ccaw hae kou a sungsah haepaw Henry te Sandra tuh, asahku haepaw amih ccaw haenih “ccaw na thyalei ohpaw, siainn na kaelei ohpaw, na ngae ohpaw, pawpaw mah nanynh langkhyh oh” cite paleih lacih haetuh, siainn alah kaebua leipaw haete ccaw athya bualei haepaw kunglang amih ngae kou lah thah.
Henry te Sandra tuh, amih ccaw hae sia inn kaelya hae, amih makhae te a umlya hae thuasa, khuazii lang amih ccaw hae a ih kou haete thusa, siainn akae bualei haepaw te ccaw athya bualei haepaw kunglang hynh, leih laho haezah, asahku haepaw ccaw hae nih hyngcih te oun nya sahae thuazei, mihlae ning tuh siainn kaebua leite ccaw thyabua leipaw hynh pawcih vemou oun nya sah ngaw hae cite amih ngae kou lathah zah, lukheih te lukheih pungku te raw te bangbang alah rahae. Thusalamah, hynh e mih ngaethyanaw hynh mih ccaw hae lahnyng sah bawi khyhae.
Tuin kyazei, ccangpaw apuithua hae ozia te alo kawhbua leipaw te nungpaw sawtua upah rawrinaw alah nyh paw tuh, Andrew cite minphuu haepaw Henry te Sandra mih ccahsuipaw nih alah thua. Andrew apuithua luh7 haenih amih nungpaw haekya, nyasah te thinglung ccinaw patae apya haezeimah, nungpaw byaho ngae te, sawtua upah rawrinaw apyathya paw mih ccahsuipaw Andrew keiccu, Henry te Sandra tuh ngaethyanaw lahku te lungpawnaw patae alah hoihae.
Aninsaw blyng thangzah, akum sae lang ounro tuh Henry te Sandra mih ccahsuipaw zeimah, high school athang sah kyte a uu hae leih lakaenaw hae University lang tuh ounkae bua vae. Sei te kum nih nintakyh arulae kuhaw te masaty lyazei university kyazei lah mang bawilei haepaw, program ccangkheih raelang cite university kawhoitu hae nih byapaenaw alah hoihae.
Tu e tuh “THE HONOURABLE PARENTS” ci thuazah, sawtua upah lang ccangpaw nungpaw hoipaw hynh, siaihmua blyng nih nungpaw kunglang, university lang nae thuakhae ci oh cite university kawhoitu haenih siaihmua hae tuh leih alaho pyahae.
Siaihmua blyng nih mih nungpaw kunglang tuh “THE HONOURABLE PARENTS” cite university lang lathua khae haehaw te Andrew nih zeimah, siainn kaelei haepaw te ccaw thyabua leipaw anung te apaw kunglang tuh mih lathua khae bua.
University siaihmua blyng nih alah thuakhae haepaw sawtua upah pyalang accangpaw nungpaw blyng kyazei, ccangkunaw ahangpaw athya ahaw haete, hoirung haepaw nungpaw patae lah umzei mah, Siainn kaelei, ccaw thyaleipaw Henry te Sandra hawte, asah kuhaepaw mihccaw blyng khah, hoite do oih te siainn kaesah te university degree lawsahpaw nungpaw luk1 sang mah lah um khyh.
Athua keiccuzei, university kya e kawhoitu hae blyng nawccaw te Andrew nih athua khaepaw anung Sandra te apaw Henry tuh, sawtua upah lang accang ccacingpaw paw te dosuin kulangpaw nungpaw “THE HONOURABLE PARENTS” nih athua cite lahpo haezah, university kya hynh poi tuapyate ccungccaw patae malang khe, “THE HONOURABLE PARENTS” lasung tuh university uktu paw nih alah pyahae.
Henry te Sandra tuh asah kuhaepaw amih ccaw hae nih siainn kaelei, ccaw thyalei cite nyasah haesah lazeimah, atyngpaw e naw te paccyng kunaw hoi haezah, lungthang leite mihccaw haekya ahoi haepaw rya hynh, athang nawcia lungsaete alawkho hae keiccuzei, dosuin kulang accangpaw te sawtua upah lang ccangpaw nungpaw “THE HONOURABLE PARENTS” degree tuh muihaezah, siainn kaelei, ccaw thyalei te university kya ccangpahtu sazae lang atang haepaw hynh ccungccaw blyng nih lawku bualang paw hingzia ccangkheih nih athua.
No comments:
Post a Comment